Kea mɛ ‑nɩ 'peejei
75
'Dʋ ‑wlʋa 'e 'dʋ ‑jeopoi 'a 'dʋsbɛ 'di ɛ, ɛɛ' "jruojɔ mɛ ‑nɩ ‑ɩn ‑bo dɛ dooa, Asafʋ 'a 'dʋ.
2 ‑Aa ‑bɛɛ' ‑ma 'nynɩ "i 'oo Kea,
‑aa ‑bɛɛ' ‑ma 'nynɩ "i, dɛ ‑ɩn ‑nɩa 'ʋn ‑mɛ ‑aa ‑tmʋ,
dɩ 'dɔe ‑ɩn nʋa mɩ ‑a ‑tɩ' ‑aa ‑tmʋ.
3 Nɔ" 'ɩn "siia 'nynɩ ‑bo ɛ nyni 'e muɛ 'ma muɛ nyɔ 'ɔ peejea'
'de "isrɛa 'ʋn 'kamɔ Tʋ "bo 'da.
4 'blʋa ke nyʋ ‑nɩa 'de ɛ "kpei 'bɛɛ ɩ 'je crɛ,
'kaa 'mɔ ‑ɔɔ kuu ɛɛ' ‑gbaatu‑ i. ‑Te' ‑kwlʋ.
5 Nyʋ ‑ʋʋa ‑bɛɛa' ʋʋa' ‑cɛi" ɛ,
'ɩn 'na ao 'bo ‑cɛi" 'beɛɛ,
'ɩn wlu 'de 'diwɔnyniiʋn ‑pee 'ɩn 'na ao 'bo "jru i nynaa.
6 Ao 'bo Kea ‑nɩa 'e jaʋn 'di wɔn o to ɛ, ao 'bo wlu saɩn poɛ.
7 Dɛwɔnɩa' se 'e 'jrʋ 'a 'wlʋɩn' ke
'jrʋ 'a bluɩn' 'de ‑pɩɩɔn" blʋa‑ "kpei 'wlʋ i.
8 Kea 'a 'sʋ mɛ ‑ɛɛ ‑je nyiɔɔ' 'pee,
ɛmɛ ‑ɛɛ jaa jrɔ' ja, ‑wɛe ‑ɛɛ kpa jrɔ' "jru 'jɛi".
9 Tʋ "bo kpʋn ɛ ‑kaʋn"‑ i,
‑wɛe ɛ po 'e ‑koonmɔ 'de ɛ "cni ɛ "i
'de 'diwɔnyniiʋn "kpei 'nɔ 'blʋɔ‑:
ʋʋ 'nɛɛ ʋʋ jeɛ ‑kɔ' ʋʋ je ɛɛ' ‑gbɔo jɛɛ‑.
10 'De 'mɔ ɛ, 'ɩn se ble ‑tɩ 'bɔ i,
'ma muɛ Sakɔbʋ 'a Kea 'a 'nynɩ "i 'bɛɛa'.
11 Ɛɛ muɛ nʋa' 'diwɔnyniʋn
‑wee'‑ "klein 'je "jru ‑kwlɩ" bla.
'Kaa nyʋ ‑jʋ ‑srɛai" ‑wi" ‑mʋ a muɛ ‑tuosʋn de poa'.